14. दडपे पोहे (पोहे भाजून)

 

साहित्य	1 वाटी पातळ पोहे, 1 मध्यम कांदा (चिरलेला), हिरव्या मिरच्या, तेल, हिंग, हळद, मोहरी, मीठ,1 चहाचा चमचा साखर, 1 चहाचा चमचा लिंबाचा रस, खोबरं कोथींबीर,
कृती	पोहे खमंग कुरकरीत भाजून घ्यावे. थोडे गार झाले की त्यात कांदा, खोबरं, कोथिंबीर, साखर, लिंबाचा रस, मीठ असं सगळं घालायचं, मग फोडणीच्या कढल्यात फोडणी करावी. तेल तापल्यावर त्यात मोहरी, हिंग, हळद, मिरच्यांचे तुडके घालावे. ती त्या सगळ्या मिश्रणामध्ये घालून सर्व गोष्टी नीट मिक्स करून वरून खोबरं कोथींबीर घालून सर्व्ह करा.
टिप	- हे मिक्स करताना हाताने करावं म्हणजे छान मिळून येतं.

13. मोकळ भाजणी

 

साहित्य	1 वाटी थालिपीठाची भाजणी, 1 वाटी चिरलेला बारीक कांदा, तिखट, मीठ, तेल (जरा जास्त लागतं), मोहरी, हळद, हिंग, कोथींबीर, खोबरं, (साजूक तूप)
कृती	एका बाऊल मध्ये भाजणी घेऊन त्यात, तिखट, मीठ आणि थोडी कोथिंबीर घालून पीठ पण्यात भिजवावी... (पोळीसाठी कणीक भजवतो तेवढी घट्ट भिजवावी). गॅसवर कढई मध्ये तेल घालावं, तेल तापलं की फोडणी करावी. त्यात मोहरी, हळद, हिंग घालावं, मग कांदा घालून गुलाबी होई पर्यंत परतायचं. आणि मग त्यात ही भिजवलेली भाजणी घालायची मग ती चांगली ढवळून वर झाकण ठेवायचं. मधून मधून जरा परतायची आणि छान मोकळी झाल्यावर वरून खोबरं कोथींबीर घालून सर्व्ह करायची...
टिप	ही मोकळ भाजणी साजूक तूप वरून घालून सर्व्ह केली तर जास्त चांगली लागते.

12. चकलीची भाजणी

 

	12
साहित्य	चार वाट्या तांदूळ, दोन वाट्या चणाडाळ, एक वाटी मूग डाळ, एक वाटी उडिद डाळ, 1 चहाचे चमचे धणे, 2 चहाचे चमचे जीरे
कृती	सगळं धान्य म्हणजे तांदूळ, चणाडाळ, मूग डाळ आणि उडिद डाळ हे सगळं  2-3 वेळा पाणी बदलून धुवायचं आणि चांगले 2 तास कपड्यावर पसरून वाळवून घ्यायचं. मग ओलं ओलंच ते तांबूस रंगावर भाजून घ्यायचं. मग त्यात धणे, जीरे भाजून घालायचे. आता ते भाजलेलं सगळं धान्य एका सुती कपड्यावर किंवा पेपरवर पसरून ठेवायचं. ते व्यवस्थित थंड झालं की (दुसर्‍या दिवशी) दळायचं. थोडंसं बारीक दळायचं.
टिप	·       भाजलेलं धान्य ताटात ठेवायचं नाही. त्याला वाफ धरते.

11. थालीपीठाची भाजणी

 

साहित्य	एक किलो तांदूळ, पाव किलो (तपकिरी) हरभरे, पाव किलो मूग, पाव किलो अख्खे काळे उडिद, अर्धा किलो ज्वारी, 30 ग्रॅम (1 वाटी) धणे, 15 ग्रॅम (4 चहाचे चमचे) जीरे
कृती	सगळे तांदूळ 2-3 वेळा पाणी बदलून धुवावेत आणि चांगले 2-3 दिवस पातळ कपड्यावर पसरून वाळवून घ्यायचे. मग ते तांबूस रंगावर भाजायचे. मग हरभरे, मूग, उडिद, ज्वारी सगळंच चांगलं खमंग भाजून घ्यायचं. (ही धान्य धुवून घ्यायची नाहीत). मग धने, जीरे भाजून घ्यायचे. आता ते भाजलेलं सगळं धान्य एका सुती कपड्यावर किंवा पेपरवर पसरून ठेवायचं. ते व्यवस्थित थंड झालं की (दुसर्‍या दिवशी) दळायचं. थोडंसं सरसरीत, भाकरीच्या पीठासारखं दळायचं.
टिप	·       भाजलेलं धान्य ताटात ठेवायचं नाही. त्याला वाफ धरते.

10. केळ्याचे गुलाबजाम

साहित्य	पाकासाठी - 2 वाटी साखर, 2 वाट्या पाणी थोडी वेलची पावडर. गुलबजामसाठी – 1 केळं, 1 वाटी बारिक रवा, 1 चहाचा चमचा तूप, (दूध लागलं तर) चिमूटभर बेकिंग सोडा, आणि सजावटीसाठी बदाम पिस्त्याचे तुकडे.
पाकाची कृती	एका पातेलीत पाणी आणि साखर एकत्र करून गॅसवर ठेवायचं, मग ढवळत रहायचं, साखर विरघळली की 2 मिनिटं उकळायचं आणि मग गॅस बंद करायचा. मग त्यात वेलची पावडर घालायची.
गुलाबजामची कृती	एका परातीत केळं कुस्करून घ्यायचं, त्यात रवा घालायचा, चमचाभर तूप घालायचं, चिमूटभर बेकिंग सोडा घालायचा. आता सगळं छान मिक्स करून घ्यायचं. वाटल्यास थोडा दूधाचा हापका मारायचा. चांगलं मऊसर मळून घ्यायचं. मग ते मिश्रण 1 तासभर झाकून ठेवून द्यायचं. मग त्याचे छोटे छोटे गोळे करून मंद आचेवर तळायचे. तळलेले गुलाबजाम ताबडतोब गरम पाकात टाकायचे. थोडावेळ मुरू द्यायचे. वरून बदाम पिस्त्याचे तुकडे टाकून सजवायचे. मस्त केळ्याचे गुलाबजाम तयार.
टिप	·         पक्का पाक करायचा नाही. ·         गुलाबजाम टाकल्यावर पाकाला एक उकळी काढली तरी चालेल त्यामुळे पाक चांगला मुरतो.

 

9. थालीपीठाच्या भाजणीचे घावन

साहित्य	थालीपीठाची भाजणी, पाणी, चिरलेला कांदा, तिखट, मीठ, तेल
कृती	थालीपीठाची भाजणी एका पातेल्यात घेऊन त्यात चिरलेला कांदा, तिखट, मीठ घालायचं. मग त्यात पाणी घालून ते चांगलं मिक्स करून घ्यायचं. मग त्याचे तव्यावर घावन घालायचे. गॅस मध्यम ठेवायचा. 3 मिनिटांनी परतायचं. घावन घालण्यापूर्वी तव्याला तेल लावून घ्यायचं. मग डिशमध्ये घेऊन चटणी किंवा सॉस किंवा दह्या सोबत ते सर्व्ह करायचे.
टिप	1.      थालिपीठाबदली घावन पटकन होतात 2.      नॉनस्टीकचा तवा असेल तर सारखं तेल लावावं लागत नाही. पहिल्या घावना नंतर भिजवलेल्या पीठातच तेल घातलं तरी घावन कमी तेलात आणि चांगले होतात.

8. नाचणीच्या पीठाचं सत्त्व

साहित्य	1 टेबल स्पून नाचणीचं पीठ, एक ग्लास दूध, साखर किंवा गूळ, ड्रायफ्रूट्स.
कृती	नाचणीचं पीठ एका पातेल्यात घेऊन त्यात अर्धा ग्लास दूध घालायचं त्यात साखर किंवा गूळ घालून ते चांगलं मिक्स करून घ्यायचं. मग ते मिश्रण गॅसवर ठेवून चांगलं शिजवून घ्यायचं. (ते मिश्रण चांगलं घट्ट होतं किंवा त्याचा रंग बदलतो ते पारदर्शक होतं). मग ते खाली उतरवून थंड झाल्यावर त्यात उरलेलं दूध घालायचं, आणि ग्लासात घेऊन वरून ड्रायफ्रूट्स घालून सर्व्ह करायचं.
टिप	1.      ही डिश खूपच पौष्टीक आहे. हाय प्रोटीन्स. 2.      उन्हाळ्यात हे खासच चांगलं तब्येतीसाठी.